小魚

今這三項會永遠存續：就是信德、希望佮仁愛、其中最偉大ê就是仁愛。（哥林多前書13章13節）

佇這个世界上，上大的是啥物咧？我家己認為著是愛；愛情、親情、友情。

若講著愛，真愛是啥物咧？我認為是捨己。若是願意為著啥物人奉獻、犧牲家己的啥物，彼才是真正的愛。

「麥琪」是智慧，「敬畏上主是智識ê根本」（箴言1章7節），Magus嘛是聖經內底彼三個賢人的意思，歸篇咧探討真正的「智慧」是啥物咧？其實，「智慧」不過是選擇做「著」的代誌，毋過這个選擇毋是遐爾簡單的代誌。

作者用真簡單閣平凡的一个故事來表達出伊所認為的「智慧」，著是「真愛」。這个故事若是發生佇阮兜隔壁，我嘛袂去共伊注意，毋過著是佇這个真細的角落，可能是定定咧發生的代誌，著存在按呢真美好的愛。

故事是發生佇聖誕節，本身著是一个充滿愛的節日，予人想著耶穌的愛，作者選擇佇這个節日內底，來予這个「愛」的行為有閣較特別的意義。

這个故事是第三人稱，是綴著女主角的一工咧過，對一个真細的錢開始，漸漸予阮看著故事內底的主角欲創啥；原本，女主角想欲送予家己的尪禮物是無啥，可能願意犧牲家己上媠的頭毛會予人淡薄仔感動，毋過真正感動的時，是到最後知影故事的兩個角色為著對方想的彼款心情的時，才真正予人動容；故事舖真久，嘛真有必要。

故事中間著偷偷佮逐家講，in兜上蓋好的物件是in夫妻各自所有的一項啥物，毋過佇故事上尾，真相公布的時陣，才知影in攏為著對方決定犧牲家己上毋甘的一項物件，予讀的人，毋單有驚喜的感覺，閣較會當感受著in的心。

真愛著是捨己，是奉獻家己上好的物件，因為愛而做的選擇，著是真正的智慧。