小魚

    故事一開始就用連紲一長段的算錢，予人看著當時做田人的辛苦，斤斤計較攏是為著生活。按呢的計算了後，出現「會社」兩字，簡單就予人知影這是台灣予日本殖民的時代，彼時陣上流行的一句話就是「第一戇，種甘蔗予會社磅」；毋過故事的主角猶是做彼「第一戇」，是為啥物咧？其實，對第一段內底會當看著，佇彼个時陣，種甘蔗已經是較好價矣，種粟仔閣比種甘蔗閣較歹生活。

    全篇是用第三人稱，真實在的描寫出彼同時的會社佮蔗農的關係，嘛用較貼近鄉土的角度，並無寫傷濟關於「會社」的想法，毋過共蔗農對會社的規定的反應，不安、不滿、嘛可能有像主角按呢，無想欲予捲入糾紛當中的人，透過in的討論、佮in的行動，予人會當感受著in的心情。

    關於生活的代誌，逐家當然關心，毋過農民想欲佮會社達著一款共識基本是無可能的代誌，關心、著會亂，互相怪來怪去到最後的結果就是連家己的共識佮目標攏無去。其實佇彼當陣，生活就是上重要--ê，逐家攏只有心思顧家己，就是彼个社會。

    對一開始的「起」，寫出主角對家己的產物真滿意的歡喜心情，到「承」的時陣不斷提醒伊是按怎的期待，到「轉」的時陣先用真客觀的角度寫出會社的拍算，予人一款對結局的料想感，用「伊是真信著會社」寫出台灣人本身所有的古意佮老實，對比了後佮料想內的結局，特別是一種無奈佮無力的感覺，上尾的「合」，嘛是咧算賬，毋過已經毋是開始的時陣彼款輕鬆快樂的感覺，毋過除了按呢，閣會當按怎？二林事件已經發生過，嘛代表按呢的制度，已經毋是一擺兩擺矣，毋過老實的做穡人，除了按呢，閣會當做啥物咧？