小魚

    對「如果別人不笑話他，他自己也要笑的」、「不能公然的而帶有某種自卑的畏縮」，到「我是大玩偶」，閣到「奇怪的是，他對這本來想拋也拋不掉的活，每天受他咒詛不停，現在他倒有些敬愛起來。」

　　彼是一款對責任的實現而來的成就感，嘛是一種心態的轉變，其實生活總是愛過，拍拚的理由總是為著這个家，生活歹過，啥物款的工課攏著做，妓女也是、坤樹也是，定定做人的笑詼，連家己攏看袂起家己，這嘛是一款大時代的不得已，無幾的人是真正好過，就算囥佇這馬嘛是仝款，為著生活，總是愛付出啥物。

　　坤樹揣這个工課，原先是不得已，是為著面對無法度的現實，毋過當伊享受佇這个生活當中的時，習慣佮責任就變成有意義的代誌。對規个故事看起來，一寡日常代誌的表達，會當知影坤樹佮阿珠是真在意彼此的夫妻，就算冤家，嘛會悔改家己的毋著，而且在意對方的感受；一場冤家，雖然予規个故事加一層礙虐的氣氛，毋過煞予後壁的好消息閣較懸的驚喜佮快樂感，更加會當感受著īn對彼此的一款迫切的心情，佮希望會當因為按呢恢復關係的心內的一種偷偷仔的心情，冤家對按呢的心情顛倒形成一種無仝的加分效果。

　　毋過，仝款ê，佇按呢歡喜的心情猶未講出喙的時，另外一件代誌就發生矣，歡喜的心情猶袂赴講出來，就雄雄毋知欲按怎面對新的代誌。阿珠明顯是無法度感受著坤樹的心情ê，雖然仝款是為這个厝拍拚，毋過支持坤樹行過所有的艱苦佮自卑、抑是別人的剾洗的來源，攏是伊的囝阿龍，「坤樹十分高興。這份活兒使他有了阿龍。有了阿龍較它忍耐這活兒的艱苦。」，伊佇辛苦工課的時，猶原對家己的囝有美好的向望佮期待，是願意為著伊按呢拍拚努力，想欲盡家己所有的氣力予囝一个家己會當予伊的上好的生活──這敢毋是所有爸母（特別是爸爸）的寫照？雖然坤樹猶閣少年，毋過嘛會當清楚的看著伊按呢的心情。

　　對伊來講，這个厝、伊的囝，就是伊一切生活動力的來源，當伊的囝竟然毋知影伊真實的模樣的時，的確是予人感覺悲哀ê，啥人知影拍拚換來ê竟然是按呢的結果？「鬼咧！你以為阿龍真正喜歡你嗎？這孩子以為真的有你現在的這樣一個人哪！」阿珠的話預示著按呢的結果，毋過當時的坤樹毋知，嘛無加想，甚至為著家己的囝因為伊按呢可笑的模樣顛倒佮意伊感覺歡喜，為著按呢的家己會當成為囝的「大玩偶」感覺自豪，心情攏好起來──煞毋知是按呢的結果？

　　敢若性命的重心佇囡仔單純直接的反應當中攏予破碎矣，這比這馬的世代定定看著ê，爸母拍拚為著予囝兒好的生活，煞予家己的囝看無，閣較悲哀。

　　雖然是第三人稱的故事，毋過透過作者生動、仔細的描寫，共所有的過程、心情攏予讀者會當清楚的感受（利用括號寫出心情嘛是真重要的筆法），嘛予讀者透過家己的想像，更加深刻的感受著主角的心情，佇上尾段，無共坤樹的心情透過第一人稱寫出來，用無法度講出喙的話，予咱感受著伊猶袂赴講出喙的頭先的歡喜心情，敢若猶未出世的嬰仔，死佇心內，更加感受著悲哀。