小魚

    對這篇小說會當清楚看著小人物的悲哀，佮面對現實的時陣，愛面對的選擇佮妥協。

    阮會當看出，萬發in兜是真散赤，無論是變賣查某囝，抑是蹛佇墓仔埔邊仔，攏會當看出來in兜閣比普遍散赤的農村社會閣邊緣。

    小說的主角是萬發，一个耳孔破病、以致聽袂清楚、予人看無的人，閣有伊愛跋筊、甚至已經失去母愛、為著錢會當變賣查某囝的某阿好，佮一个姓簡的賣衫商人。

    經濟起飛的彼个年代，台灣社會的經濟發展對農轉工商，真濟人無法度習慣按呢的轉變，煞佇按呢的環境當中變成受害的一群，閣較毋免講像萬發按呢有殘疾的人矣。

    小說開頭就用Henry James的"The Portrait of a Lady"做引，"The Portrait of a Lady"有拍成電影，佇台灣翻譯成《伴我一世情》，故事內容煞是一个有財產的查某人因為對愛情理想的想像，予人騙去的故事；人矣！無錢的時陣會為著錢心傷，有錢的時陣嘛是為錢受傷，攏是為著錢！

    故事是對結果寫起，一開始就予讀者知影萬發是一个臭耳聾，而且是一个予別人笑詼的人，為啥物咧？猶毋知影，毋過伊有講著一个「姓簡的」。

    伊回想起過去的日子，伊的耳孔破病的原因、伊愛跋筊的某，佮有一工雄雄搬到in兜附近的姓簡的——一切的開端。

    其實伊對伊的某實在傷無看重，對一開始伊一直對姓簡的厝內走的時陣，伊就應該有防範，煞是拖到in已經予人傳到風風火火，伊才警醒過來，其實早就已經袂赴矣。

    in的日子實在是艱苦的，而且對故事前半看來，阿好嘛實在是一个為著錢生存的某，萬發的能力，根本就無法度滿足伊；這个時陣，有錢、閣單身的商人入蹛in的隔壁，叫阿好按怎毋心動？

    經歷遐爾濟，萬發最後選擇妥協，其實伊所考慮的嘛只是伊的囝佮某爾，這个對伊佇牢內所想的代誌就會當知影，伊的確是無能力會當予in過好的生活，伊對阿好的愛是按怎的一款型式，抑是查埔人對「家己的物件」的一款占有爾，毋過，這个念頭放下矣，就啥物攏袂要緊矣。

    就Maslow的需求理論來講，人第一需要滿足的需求就是生理需求，若無這，後壁的啥物攏免講；萬發in，嘛是按呢的情形。阿好會當為著伊家己的滿足，會當不顧倫理道德、佮別人的閒仔話，萬發為著生活、為著食飽，會當犧牲家己的不滿，其實，嘛只不過是各取所需爾爾。

    作者想欲予人看著的是人佇面對金錢的時所做的現實的選擇，會當予人放拺應該有的道德感，按呢講嘛無毋著，其實若是姓簡的無出現，in的生活雖然苦，煞毋是袂當過落去，若是會當彼此相愛、彼此珍惜，嘛是會當過了充實快樂，嘛閣伊佮阿好，雖然有早暗，嘛攏是選擇好的生活，犧牲夫妻的名份，現實，終究是現實的。