小魚

若是欲講起我印象上深ê代誌，先勿講對細漢到大漢，遮爾多代誌做伙想起來，我真正毋知欲寫佗一個tsiah好。
想想咧，抑是寫最近的服貿好矣。
頂禮拜，我嘛是走去台北的人之一。其實我的厝內是真正反對我去參加活動ê，我的爸母並無贊成服貿，但是這甲答應我去台北是無仝ê代誌；in感覺這个活動是危險ê，而且無夠理性，並無希望我去。
我承認偷走--去的我是做了無好ê示範，但是我想欲用我的目睭去看覓咧，去看代誌的真相，我無想卜關佇網路後壁，啥物攏看無，啥物攏毋知，只會當看逐家冤家，但是啥物才是真ê我攏毋知。
真衝動，毋過我感覺這就是我的心，我知影我若是無按呢做，我袂當平靜。
佇現場，我看著毋是啥物偌特別ê場面，無大聲喝，無激動，只是逐家真有規矩ê坐佇塗跤，聽佇現場的老師講話，聽其他同學的想法，攏是尊重，攏是學習。
我感覺真佩服，平常時可能啥物攏無關心的同學，這馬會同齊為著啥物咧拍拚，遵守規矩，只是想欲予人聽見in的想法。
去到遐，是一種無法度形容的感覺，是一款感動，嘛是一款學習，學習一種態度。
我感覺，毋敢保證講佇遐的逐个同學是攏了解in咧反對的是啥物，可能是反烏箱，可能mā有親像我閣較反服貿的人，嘛可能是佮我去遐的理由仝款，想欲去看清楚事實。
但是我看著in的決心，in的覺悟，in為著家己的國家卜來做啥物的堅定ê眼神。
彼是我印象上深ê，到這馬攏無法度袂記，大概永遠攏無法度，嘛無想欲袂記的代誌。

https://www.youtube.com/watch?v=2a4VGbI22RA