小魚

有時陣，大人咧講，囡仔人有耳無喙，叫咱著愛恬恬聽，聽in講啥物to̍h-sī啥物；我自細漢恬恬聽，恬恬想，恬恬看。

最近有一个議題(gī-tê)，叫做服貿(ho̍k bōo)，相信逐家攏知；我毋是卜來甲逐家講啥物是服貿，只是來分享是按怎我欲去台北，閣有我看著的物件。

今仔日佇遮只是來共逐家講我佇頂禮拜四的經歷佮一寡心得，可能有真主觀的部份，反對也好贊成也好，只是欲來共逐家講這件代誌對我的影響。

其實佇頂拜三的時，我著已經有去台北的想法，暗時偷偷暗示(àm-sī)爸爸，我知影伊並無希望我去，毋過我無想欲擱恬恬聽，無想欲擱有耳無喙。

佇遮我欲來共逐家會失禮，因為我其實是一个無好ê示範(sī-huān)，逐家若是想欲去台北，一定愛佮厝內講。

拜三暗時我的心情直直無法度平靜，我感覺我需要去做啥物，毋是佇遮恬恬看，予電腦關佇家己的世界，啥物是事實我欲用家己的目睭看清楚，有可能，我看著的嘛毋是事實，人攏講，這馬看著的攏是假ê，毋過我相信我家己看著，而且家己思考過的物件。

拜四下早仔，臨時佮語嫣講好，阮著直接共老師講，馬上去坐車矣。

阮過了中晝才到台北，其實干焦去二點鐘左右，毋過我感覺彼大概是我永遠無法度袂記、嘛袂當袂記的代誌。

我看著一陣人坐佇立法院的門口，冷靜擱理性ê咧討論服貿這件代誌，老師佇頭前講話，若像佇學校上課仝款；無毋著，in著若像in講ê，是咧學習，學習一个民主的精神(tsing-sîn)。我著咧想，啥物是暴民？敢是這馬坐佇遮的人？

印象上深的是，彼當陣in發現塗跤無夠清氣(tshing-khì)，馬上有人自動徛起來收糞埽，非常有秩序(tiat-sū)；我定定咧想，若是有爸母來到遮，敢袂感動？其實in的囡仔，嘛是會當放棄電動為著啥物來做伙拍拚，無冤家，只有堅定。

我想，這著是少年人，in可能無親像大人看了遐濟，毋過in有為著啥物去拍拚的活力(ua̍h-li̍k)，有堅定ê決心，有啥物攏毋驚的勇氣。

若是會當，我想欲佇遐坐較久ê，我嘛想欲做淡薄仔我會當做的代誌；一个人的氣力雖然細，毋過攏是一種堅持。若是你有勇氣，去看覓咧，彼真正是一款學習、佮感動。

有人問我，著算講我去遐，擱會當做啥？我只會當共你講，啥物攏袂當。

毋過，若是逐家攏按呢想，立法院外口著會無人，內底的人嘛袂當擋遮久，任何人的力量，攏是力量，我從來毋捌想欲放棄；可能有反對靜坐的人感覺按呢的想法已經無藥醫矣，我嘛是欲堅持。你問我為啥物？因為這著是我所相信ê。我無法度忍受我家己只會曉佇FB頂懸直直講毋過啥物攏無去做，所以我去矣，去做所有我想著我會當做的代誌。

我傷激動嘛？我無理智嘛？毋是，彼是因為看著in的決心ê感動，予我閣較清楚我想欲啥物、我欲做啥物。其實，我感覺無去現場感受過in ê覺悟、一款連性命攏會當付出ê覺悟ê人，實在無資格講人啥物，連我嘛袂當，因為我無按呢ê覺悟，我感覺真歹勢。

我相信我的目睭看著的一切，相信我的耳孔聽著的一切，相信我家己聽了、看了了後，所分辨ê、所思考ê，因為彼著是我，而且無論贊成抑是反對，這攏是台灣咧發生的一切，將來嘛會變做台灣的歷史，按呢，我願意用我的目睭去看，去瞭解當咧(tng-leh)發生的代誌。

我敢講，這著是我願意付出啥物去堅持的信念(sìn-liām)，嘛是我所相信ê。