小魚

受訪者基本資料

1.名姓：張清抄

2.佮妳ê關係：祖孫

3.佗位人：雲林人

4.蹛過啥物所在：大埤

5.讀過啥物學校：日本小學校到三年

6.食過啥物頭路：童乩、家己做田

較大項的代誌

阮阿公的查某囝（著是我阿姑）細漢的時陣有一擺破病，險險死去，診所毋願意收，因為阮兜傷散，連頂擺的錢攏猶未付，送到大病院，無幾工人著共阮阿公阿媽講會當抱轉去矣，已經無藥醫矣；阮阿公無辦法，去拜in庄內的廟，講若是會當醫好我阿姑，著去做童乩，提著一張符仔，予阮阿姑啉落去了後著好矣！因為按呢，阮阿公著做了欲一世人的童乩。

阿公嘛捌予日本徵召去做日本兵，毋過只做了二個月著轉來矣（若像是拄著改制），佇這進前，伊有一个哥哥嘛去做兵矣，毋過竟然逃兵！對高雄逃出--來，一路覕，一路行，行了二個外月才轉到厝內，閣佇厝內覕真久，直直等到彼个改制的時陣，日本人無欲掠矣，伊阿兄才逃過一劫。

後來，因為阮阿媽上吊自殺，伊感覺伊一直信的神佇伊真正需要幫助的時陣並無真正照顧伊的需要，加上後來伊家己親身經歷過聖靈充滿，而且伊長時間咧疼的跤嘛予上帝醫治好矣，嘛看著阮遮--的後輩攏因為信主的關係逐个攏真喜樂，伊著決定欲受洗，嘛真正佇舊年受洗矣！感謝主！

近現代的的代誌

阿公真正討厭國民黨是對228事件開始（我想應該真少人經歷過按呢的代誌抑會當佮意國民黨pah？），阮兜算是無啥物因為228事件受著傷害的家庭，算是真幸運，毋過阮阿公是一个真正直的人，所以無辦法接受按呢的代誌，閣較按怎講，彼嘛是家己的同胞；而且，一部分嘛因為我進前講過的，我的阿公真滿意日本治理台灣的時陣所做的真濟政策，因為對in的生活是真正有幫助，予in會當過閣較便利的生活，換了國民政府了後，啥物攏無較好，閣毋單，猶閣較䆀。

228了後，閣有一件代誌予伊實在無法度對國民黨有好印象，著是四萬換一箍的代誌，伊感覺這是一件真無公義的代誌，予in的日子閣較歹過，毋過可能有一寡和政府較有關係的人已經有準備矣，早著共錢提去買黃金，對in並無太大的影響，毋過對我阿公來講，伊只是一个散赤的農民抑是童乩，按呢的政策實在予阮兜giōng-beh過袂落去，甚至連過年攏欲去借錢買罐頭才會當過。

閣有一件代誌是八七水災，彼當陣伊佮我阿媽閣和我阿祖蹛，八七水災過了in才搬出--來，閣佇阿祖予in的一塊漉糊糜地頂懸，到河邊，一塊一塊的扛石頭，共地舖平，才起了我這馬過年的時陣轉去的彼間塗角厝。

心得

其實我的阿公生活真平凡，毋過我感覺上了不起的著是伊有一个真正直的心，伊雖然無啥物讀過冊，毋過問起我阿爸，伊共我講，我的阿公從來毋捌挫姦撟、毋捌食檳榔、毋捌pok薰、嘛毋捌啉酒，予in真大的影響；而且，阿公阿媽佇庄內的風評是真好，若是共人借物件，in攏會佮物件洗甲清氣溜溜才還人，所以逐家攏真願意借in物件。

我的阿公嘛是一个真疼囡仔的爸爸，親像阮阿姑，當初伊欲佮姑丈結婚的時陣，其實真煩惱阿公會因為以前我阿姑的彼件代誌毋答應（因為阮姑丈是一个基督徒，彼當陣阿公猶咧做童乩），毋過阿公並無反對in的婚姻，閣牽--著阮阿姑的手入去教堂，真感動，彼嘛是伊頭一擺聽牧師講道理；我爸爸欲讀國中的時陣，阿公阿媽嘛全力支持伊的決定，彼時，厝內的日子雖然毋是真好過，in嘛願意閣較拍拚趁錢，只是為著予阮爸爸會當讀伊想欲讀的升學率較懸的私立學校，爸爸嘛無予in失望，用前三名的成績考入去台中師專，著是我的學長。

阿公真歡喜的一件代誌著是，伊的三個囝除了阮阿姑之外攏考牢師專，攏做到校長，這是伊毋捌想過，嘛無想著的代誌。我咧想，嘛是因為阮兜散赤，佇彼時，散赤囡仔若想欲讀冊，攏愛拚性命去讀、去考，嘛是因為阮阿公予in真濟正面的影響。

阿公毋是真知影欲按怎佮別人互動，是因為伊有一段時間攏咧共人顧鴨寮，一个人蹛佇河邊，攏無佮別人互動的時間，彼段時間落來，伊變甲毋知欲按怎對毋是家己世界的人講話，平常講話嘛真少。

我的阿公嘛真古錐，彼當陣伊明明著願意信主，毋過煞毋敢受洗，問伊為啥物，伊講因為伊有一个親家，當初因為生重病，後來信主了後決定欲受洗，彼時無水池會當予in受洗，in攏是直接用溪水，下到大水溝內底受洗，毋過，伊彼个親家著過身矣，所以阮阿公直直無想欲受洗嘛是這个原因；一直到伊有真大感動共醫治了後，馬上著決定欲受洗，閣踏著正步欲去台前欲牧師趕緊幫伊洗，是毋是足可愛？

阿公信主了後變甲較喜樂，閣生出烏頭毛矣呢！這馬的我，若是看著阿公的笑容，著會感覺真歡喜，我的印象當中，無親像這馬按呢，遮爾喜樂。

這馬我讀台語系，上歡喜的著是我的阿公，聽講伊閣捌佇我佮弟弟細漢的時陣罵過阮，因為阮攏一直咧講華語，伊實在足無歡喜，這馬我共伊講我讀台語系，伊歡喜甲拍撲仔呢！

我的阿公，實在真特別！