小魚

一个女人無可奈何的命運。

佇彼个時代下，女人家講話根本就無地位，人共你做啥就是啥，就算是予人騙去，嘛猶原袂當做聲，佳哉伊有一个疼伊的老母，加減有人替伊講話，毋過嘛會當看著，伊的老爸一句話攏無講，就按呢看家己的查某囝予人騙去，煞敢若淡薄仔感覺攏無。

歸仁阿媽算是真有家己想法的女性矣，伊做出家己的選擇，選擇離開原本的家，毋過煞毋知這个社會才毋管是因為啥物，凊彩就看別人無，伊欲揣著家己的幸福，嘛真困難，並毋是啥物代誌攏會有浪漫的結果，這就是現實。

第二擺的婚姻根本就袂當講做是婚姻，對方根本共伊當做是下跤人，連基本的名份就無，連伊認真疼惜的前人囝，攏看伊袂去，這是偌悲傷的一款感覺？

其實，伊會當選擇第一擺的離開，為啥物袂當選擇第字擺？我想，嘛是經歷過社會的無情、嘛是因為年紀大矣想欲追求安穩就好的生活，煞無選擇離開。

這是一的時代下必然的悲哀，無錢、無權勢，就無任何地位；無人會佮意選擇無好的命運，歸仁阿媽認真的選擇伊想欲愛的人生，毋過嘛是無法度臆著人心的烏暗，上尾猶原無法度家己決定。

伊的親生囝，攏算是真捌代誌，願意放下心內的感受，毋知影家己的阿母毋是家己甘願無去看，是講袂了的不得已；我會當明白囡仔的感受，只會感覺家己予人放捒，無爸無母，按呢的人生嘛真辛苦，真濟人是無法度原諒ê，毋過選擇好ê，對逐家攏好。

時代的必然性，雖然是真濟所在攏會發生的代誌，毋過作者共伊寫出來，無傷濟角色，煞予人共人性看清清。愈平常的代誌，愈會當看著無隱藏的人性。