我感覺葉石濤的這本《西拉雅末裔潘銀花》的題材確實予我感覺真趣味，主角毋單是一个女性，更加是一个平埔族原住民的女性，按呢的題材有影較少看見，毋單佇角色的性格上予人新的感受，更加會引起對按呢的取材的原因的思考。
其實葉石濤的劇情安排嘛是有影趣味，潘銀花有五个查埔人，若是共台灣的歷史對這馬開始向以早算，嘛是拄好五个時期的殖民政府；雖然我無法度照順序佇角色佮這五个時期之間揣--著真正的比喻關聯，有的嘛無啥相，毋過干焦是按呢就予我感覺真趣味矣！毋知葉先生佇寫按呢的劇情安排的時陣，心內咧想啥咧？敢是有意識的咧安排按呢的劇情，抑是一个拄好的代誌？我甘願相信是前者！
我感覺潘銀花的確是一个特別的女性，伊美麗自信的性格會吸引--人來看這本小說，其實我想，佮意這个故事的人，會使講毋單是佮意葉石濤的文筆，更加是愛著潘銀花矣！予這本冊吸引著的人，攏是伊的俘虜。其實就若像宋澤萊講--ê，潘銀花是一个扁的人物；我感覺雖然圓的人物會予故事一種真實感，會當予讀者聯想著家己的人生，毋過扁的人物的經典的感覺嘛是無仝的感受，扁平的人物，就若像潘銀花，因為是佇現實生活當中會當講是從來毋捌拄著的人物，而且嘛會當講，因為伊是一个扁平人物，佇咱的生活當中，實在是無可能拄著的人啊！若是有按呢的人，的確佇逐家的眼中，伊就是一个傳奇的人物囉！所以講，我感覺潘銀花伊吸引人的所在嘛因為伊是一个扁平人物，伊永遠是美麗自信ê，袂為著生活來煩惱抑是怨嘆，按呢的典型有影適合營造出一種「大地之母」的感覺，有明顯的代表性，規个小說內底別个人攏干焦是過客，毋過只有伊一直佇遐。
佇故事內底，上悲哀的是，這五个查埔人無一个是佮潘銀花仝款的Chiraya，予我想著就若像臺灣這塊土地，其實就是按呢，佇臺灣的原住民佇殖民者來了後，就毋捌真正做過這塊土地的主人，in佮土地共同生存，毋過對荷西殖民開始，佔有土地的人就是遮的外來者，就像潘銀花伊一生的五个查埔，嘛予阮看著到彼个時陣的原住民佇社會當中是按怎的一个階級佮直欲予人滅絕。
佇這本小說當中，另外一个真妙的點就是，雖然伊敢若咧寫潘銀花的一生，毋過同時伊的一生拄好嘛經過兩个殖民時期，是近代的臺灣史當中，佮咱上有關嘛上有記持的時期。佇小說內底會當對背景佮環境發生的代誌來看著彼時陣的歷史佮畫面，透過潘銀花，這个雖然傳奇毋過佇大時代當中其實嘛是一个小人物的故事，來描寫、予阮看著當時發生的代誌，更加知影佇彼个時陣的人民身軀邊是按怎的生活佮氣氛；特別的是，潘銀花的角色性格並無在意遮ê代誌，伊就是佇不斷變化的時代當中生活，伊猶原是伊，這就是宋澤萊講--ê，伊「大地之母」的代表矣，伊永遠是包容佮接受，並無怨言；阮嘛會當看著一个真趣味的點，就是彼五个查埔人雖然攏對潘銀花的性命造成無仝的改變，阮嘛敢若會當想講，潘銀花身為一个殖民時期的原住民，伊本底就是弱勢，是會當按怎反抗？敢若按怎反抗嘛袂贏，所以伊才順應時代咧活，我相信一定有人會按呢想，毋過佇我看起來，彼五个查埔雖然是一个殖民者的代表，侵入這塊土地，毋過其實真正需要土地ê是in，是潘銀花「選擇」接受in，就若像伊性命中的第五个查埔人汪書安，是伊共伊「娶」--轉來，其實這五个查埔攏需要伊（的身體），殖民者若是無土地，是無法度成就in的殖民ê，是潘銀花選擇接受，毋是in佔有伊。
我感覺這篇是我這學期讀的評論內底上佮意的一个作品，伊雖然無傷強烈的情感，就是潘銀花美麗、自信、包容、勇敢的性格代表一切，其實嘛無啥物真劇情化的內容，毋過煞有影代表一種歷史、代表一个土地，予人印象真深。
Q：
1.若是欲寫一篇小說，你會選擇共你的角色寫做扁平抑是圓ê？
2.你感覺葉石濤是毋是有成功佇你的心中塑造出潘銀花的形象？你感覺宋澤萊用「大地之母」來解釋按呢的塑造敢合理？
留言列表
