小魚

       灣生，一陣共臺灣當做in的故鄉的日本人。

　　我上佮意的阿公阿媽是富永勝阿公佮多恵子阿媽，in予我感覺有滿滿的熱情佮對臺灣的熱愛，毋是講別人無，毋過我感覺in是真可愛的兩个阿公阿媽，可能是本身就是真有活力的人，毋過我更加相信是因為in對臺灣的愛，予in佇這片土地的時陣予in有美好的感覺。

　　佇富永勝阿公來到伊的一个朋友in兜，煞發現佇伊ê卡片寄著進前，伊的朋友煞已經過身矣，伊的真濟朋友嘛真濟攏無佇咧矣，這予我感覺真毋甘，我無法度想像佇滿心歡喜來到臺灣（伊的故鄉）的時陣，煞人事已非的感覺，彼有偌艱苦？毋過伊對臺灣猶是充滿熱情，聽伊講起伊的回憶，我感覺嘛會當感受著遐ê美好的少年時光。

　　另外一个多恵子阿媽我更加佮意，可能伊的個性本底就是我較會佮意的老人，伊予我感覺真堅強，嘛有對臺灣不變的熱情佮堅持，已經毋但是對臺灣的回憶爾爾，彼是對臺灣真正的愛，所以伊佇揣著伊的戶口的時陣、提著遐ê資料的時，忍袂牢伊的目屎，彼是對伊的故鄉的渴慕。佇伊轉去台北女中的時，我看著以早的相片佮這馬強欲攏無啥變，我就想，若是我，一定真感慨、真感動，若是我佇彼个歲數，轉去到以早的學校，攏敢若猶會當看著家己以前佇內底的生活佮模樣，我應該會擋袂牢我的目屎。

　　我咧想，遮ê阿公阿媽，in對臺灣的愛，阮敢比ê著？臺灣是咱的國家，毋過佇真濟人心底，臺灣敢是in的故鄉？可能灣生是因為in一生當中上美好的時間、上單純的時間、上敢去愛的時間，攏是佇臺灣度過ê，所以in留咧遐ê美好印象，對臺灣有無法度取代的歸屬感；毋過佇臺灣出生大漢的阮，敢有按呢去珍惜過一片土地？我定定咧想，siáng是臺灣人？這是佇這馬的臺灣社會當中，定定會討論著的問題。確實，我認為，真正愛臺灣ê，就是臺灣人矣，無啥物佇佗位出生、祖先是佗位的人的問題，真正的問題是，你愛臺灣無？