小魚

　　我佇這篇論文當中學著真濟，我第一擺知影一篇小說是用遐爾濟的角度來分析--ê，而且原來一篇小說內底會當看著遐爾濟物件（以早的我攏是看過去爾爾，頂學期是第一擺用無仝的角度去看作品），毋過宋澤萊的一篇論文予我拍開一个新的視野，知影原來寫一篇小說的時陣愛注意的有遐濟，而且別人會用啥物角度咧看--你。

　　比如講第一部分講--ê，人物的描寫，若是我家己看，絕對無法度對這款的角度來分析思考，只會曉戇戇綴咧看，嘛是講綴咧作家的功力咧走，毋過家己無啥物深入的思考；這擺我學著平常袂注意著--ê，人物的性格無需要直接寫出--來，透過伊穿的衫、眼神、動作、閣有外表，就會當予人產生對這个人的感覺佮想像，而且更加有畫面。另外一部分提著，人物有分扁ê佮圓ê，這嘛予我一个新的熟似，以早看小說嘛攏完全袂按呢思考，家己試看咧寫嘛攏無思考過這款代誌，以前就是寫趣味ê，毋過看了遮ê分析閣回想家己以早無成熟的作品，實在亂到連用按呢的方式去分析攏無辦法，會當予人分析的作品，本身就愛是一个真好的作品才會使！

　　第二部分咧講背景，我感覺佇〈植〉內底背景佮角色的關係內底，我看著的是主角的心情佮伊所看著的景物的關係，人的心情佮意識會影響伊所看著的物件，雖然作者嘛有一寡對景色的安排（日頭的部分），毋過我感覺予我較深刻印象的是角色心情佮背景的關連，因為伊的景色描寫真濟是透過主角的目睭來看ê，予我閣較自然、無刻意安排的感受，因為彼就是這个角色彼陣的心情會看著、感受著ê無毋著，這是我非常佮意的部分，毋是作者家己描寫來配合氣氛佮角色，是透過角色的目睭看世界，予讀者會當更加深入的感受著角色的心情。

　　我感覺〈植〉文予我感覺上佮意的部分就是伊的自然，嘛是講存在佇伊的「無意識」的部分，我感覺這就是為啥物伊會當變做經典，佇伊筆下的陳有三的命運，敢若是一款必然煞無可奈何，陳有三予人感覺是真實ê，伊的想法是活ê、遭遇是實在ê，無傷過譀古的劇情發展抑是無合理的主角性格，伊是悲劇，毋過嘛無悲劇到悲哀（想起〈嫁粧一牛車〉，彼是真正悲哀矣），更加予人看著一切的主因，就是伊所生活彼款的環境，佇彼款環境內底，遮攏是必然ê，若像伊身軀邊遐ê人，伊想欲逃避的彼款人佮性命，in的悲劇是對佗位來？毋就是in所佇咧的社會、時代、環境？

Q：若是你是陳有三，你會選擇按怎過生活？