小魚

Tsit kuí lé-pài, guá ìn-siōng siōng tshim ê to̍h-sī "khan gún ê tshiú" kah "hó kok hó bîn" tsit nn̄g-pōo iánn-phìnn, m̄-tann sī Lîm gī-hiông sian-sinn kóng ê "tsí-ū ài kah guân-liōng" hōo guá ê ba̍k-sái bô-huat-tōo thîng-tsí.

Nā-sī kóng siánn-mih sī Tâi-uân lâng, guá kám-kak to̍h-sī in ah pah! Tsit-má kóng siánn-mih lóng bē tsún, guá m̄-tsai-iánn mā m̄-kánn tsin khíng-tīng ê kóng guá sī-m̄-sī kánn uī-tio̍h Tâi-uân hù-tshut án-ne ê tāi-kè sóo-í guá tsin-tsiànn kìng-puē in ê ióng-khì.

Pún-thóo ê kàu-ha̍k tsin-tsiànn tsin tiōng-iàu, nā-sī m̄ liáu-kái ka-tī ê li̍k-sú, beh án-tsuánn kóng ka-tī sī siánn-mih lâng? Ē kì-ti̍t guá thiann-kuè tsi̍t-ê lāu-su kóng ê, ta̍k-ê gí-giân lóng tsin tiōng-iàu, in-uī tsi̍t-ê gí-giân ē-tàng tāi-piáu tsi̍t-ê tē-hong ê bûn-huà kah tē-lí, sing-bu̍t koh-ū tsin-tsē ê mi̍h-kiānn, hōo í-tsîng pīng-bô tsin tiōng-sī Tâi-gí ê guá ū tsin-tsē su-khó,thiann-kuè i ê ián-káng tsiah huat-hiān ka-tī ê bûn-huà, ka-tī ê li̍k-sú ū guā tiōng-iàu, tse tsiah-sī tāi-piáu tsi̍t-ê kok-ka ê mi̍h-kiānn.

Guá siūnn, 228 pe̍h-sik khióng-pòo sū-kiānn tsō-sîng ê tsua̍t-tuì m̄-tann sī Tâi-uân-lâng kàu-tann uî-tsí ê hun-lia̍t nia̋nn, koh-ū tsit-má ê Tâi-uân-lâng lóng khiàm-khuat tsin-tsiànn khì kiám-thóo tsò m̄-hó ê tsìng-hú ê ióng-khì, sui-jiân lán sī tsi̍t-ê bîn-tsú kok-ka, ta̍k-ke mā-ū giân-lūn tsū-iû, m̄-koh tsin-tsió lâng kánn tsin-tsiànn huán-khòng tsìng-hú, tsò-tshut ná-tshiūnn guā-kok ê khòng-gī iah-sī kik-bīng án-ne ê tāi-tsì, guá kám-kak, tsit-pái ê ha̍k-ūn, i-kīng sī sió-khuá thuat-lī 228 ê ok-bāng ê sin-it-tāi sóo-tsò ê siōng-tuā ê lóo-li̍k kah Tâi-uân-lâng kánn huat-tshut ê siōng-tuā ê siann-im ah.

Khuànn-tio̍h Tshân i-su án-ne ê lâng, kàu lî-khui tsìn-tsîng lóng iah leh siūnn Tâi-uân to̍k-li̍p ê tāi-tsì, guá tsin-tsiànn kám-kak tsiok kan-khóo, ka-tsài i bô ua̍h kàu-tann, bián khuànn-tio̍h kok-bîn-tóng kah-i sóo-ài ê Tâi-uân tshòng kah piàn-tsó siánn-mih khuánn.

Tâi-uân ê to̍k-li̍p tsi lōo siánn-mih sî-tsūn tsiah-sī tsi̍t-ê tsīn-thâu leh? Siánn-mih sî-tsūn tsiah ē-tàng mài-koh hi-sing hiah-nī tsē ê hueh?

Hueh sī hô, hueh sī kang, hueh sī siōng un-sûn ê kua.......