小魚

Kî-si̍t, tsit-tuānn sî-kan í-lâi, khuànn ta̍k-tuānn iánn-phìnn, guá lóng kám-kak tsin kan-khóo koh tsin siū-khì.

Í-tsîng tsí-ū tsi̍t-ê miâ-sû tn̂g-tōo ê li̍k-sú, kàu-tann piàn-sîng ū hueh ū bah ê uē-bīn. Guá bô-huat-tōo bô khì thiann, bô-huat-tōo tòng-tsò siánn-mih lóng-bô, in-uī he-sī tsin-tsiànn huat-sing kuè ê, sin-uî Tâi-uân-lâng ing-kai beh tsai-iánn ê tāi-tsì.

Sī-m̄-sī ta̍k-ke lóng kā kuè-khì buē-kì ah, sī-m̄-sī bô king-li̍k kuè to̍h ē-tàng siūnn kā ka-tī bô-kuan-hē?

Guá kám-kak, in ê pún-sìng lóng-tsóng bô piān, sui-jiân tsuè-kūn ê tāi-tsì bô tshin-tshiūnn í-tsîng hiah-nī khióng-pòo, m̄-koh in pō-li̍k、bô tsun-tiōng、bû sī jîn-bîn ê pún-tsit iah-sī kâng-khuán, hōo lâng kám-kak thái-ko.

Sin-uî Tâi-uân-lâng, to̍h ài ha̍k-sip gún ka-tī ê li̍k-sú, tsai-iánn huat-sing kuè siánn-mih tāi-tsì, jî-tshiánn kā i kì tī sim-lāi. Tsit-má ê lâng, sī-m̄-sī siánn-mih lóng buē-kì ah? Sui-jiân bô king-li̍k kuè, suah m̄-bat siūnn-beh khì liáu-kái, jiân-āu huat-tshut m̄-tsai sí-ua̍h ê siann-im.

Tsuè-kūn ū khuànn-tio̍h thô-hn̂g lâng tī bāng-lōo tíng-kuân ū tsi̍t-ê phiò-suán, luē-iông tāi-khài sī in tuì huán-tuì hi̍k-lîng ê khuànn-huat, kíng-jiân ū tshiau-kuè tsi̍t-puànn ê lâng suán kóng siūnn-beh tiông-sin khai-sí kài-giâm, in-uī in kám-kak khòng-gī ê lâng siunn-tsē ē íng-hióng tio̍h in ê sing-ua̍h. Guá to̍h leh siūnn, in kam tsin-tsiànn tsai-iánn kài-giâm sī siánn-mih? Kam tsai-iánn he ū guā khióng-pòo? Kam tsai-iánn án-ne liân in lóng-ē bô tsū-iû?

Guá ê sim tsiok thiànn, ba̍k-sái m̄-tsai-iánn tang-sî lak--lo̍h-lâi, kuè-khì ê ok-bāng bô-lâng kì-tit, tsí ē-hiáu lōng-huì tshinn-hueh sóo phoo-sîng ê bîn-tsú kah giân-lūn ê tsū-iû.