我感覺宋澤萊咧分析這首〈伊咧等我〉分析佮真詳細,我必須承認我家己實在無法度閣看出啥物矣。
尤其是佇色緻的部分,宋先生講出我心內感覺著煞毋知欲按怎形容的物件,就是色緻予人的感覺,毋管是「金色」的相思海、「月光」、「西照日」、抑是「cocoa」,攏𤆬出黃色佮紅色的色調,攏是溫暖的色緻,予規首詩充滿希望佮熱情的感覺,彼是一款性命的活力,這是我規首詩上佮意的部分;頭一擺讀這首詩的時陣,感覺心內是滿ê,這是真特別的感覺,我以前毋捌有--過,雖然無啥習慣詩內底情愛的部分,毋過因為作者採用按呢的色調,加上這首詩是「我」的第一人稱,規首詩讀落來感覺家己若像彼个男主角,對暗時有期待、對未來有期待,日子逐工攏遐爾單純,充滿了希望。