小魚

       我感覺宋澤萊咧分析這首〈伊咧等我〉分析佮真詳細，我必須承認我家己實在無法度閣看出啥物矣。

　　尤其是佇色緻的部分，宋先生講出我心內感覺著煞毋知欲按怎形容的物件，就是色緻予人的感覺，毋管是「金色」的相思海、「月光」、「西照日」、抑是「cocoa」，攏

這場演講是11/21佇文化創意園區舉辦ê，是文化部的全國巡迴書展的活動，我去一个小學參訪的時陣拄好看著伊的海報，有我佮意的作家，就決定欲來聽，雖然好笑的是，我因為家己的錯誤無聽著我佮意的作家演講，反倒聽著廖老師的演講，毋過我感覺真值得，這是我真佮意的一場演講，嘛因此我對原本對廖老師無啥了解，變佮閣較有興趣。

我感覺廖老師是一个真有魅力的演講者，伊風趣、佇性命當中嘛充滿故事性佮文學性，聽伊的演講是真有趣味，規場差不多攏無冷場，逐家攏真專心咧聽。

       我感覺葉石濤的這本《西拉雅末裔潘銀花》的題材確實予我感覺真趣味，主角毋單是一个女性，更加是一个平埔族原住民的女性，按呢的題材有影較少看見，毋單佇角色的性格上予人新的感受，更加會引起對按呢的取材的原因的思考。

       其實葉石濤的劇情安排嘛是有影趣味，潘銀花有五个查埔人，若是共台灣的歷史對這馬開始向以早算，嘛是拄好五个時期的殖民政府；雖然我無法度照順序佇角色佮這五个時期之間揣--著真正的比喻關聯，有的嘛無啥相，毋過干焦是按呢就予我感覺真趣味矣！毋知葉先生佇寫按呢的劇情安排的時陣，心內咧想啥咧？敢是有意識的咧安排按呢的劇情，抑是一个拄好的代誌？我甘願相信是前者！

       我感覺潘銀花的確是一个特別的女性，伊美麗自信的性格會吸引--人來看這本小說，其實我想，佮意這个故事的人，會使講毋單是佮意葉石濤的文筆，更加是愛著潘銀花矣！予這本冊吸引著的人，攏是伊的俘虜。其實就若像宋澤萊講--ê，潘銀花是一个扁的人物；我感覺雖然圓的人物會予故事一種真實感，會當予讀者聯想著家己的人生，毋過扁的人物的經典的感覺嘛是無仝的感受，扁平的人物，就若像潘銀花，因為是佇現實生活當中會當講是從來毋捌拄著的人物，而且嘛會當講，因為伊是一个扁平人物，佇咱的生活當中，實在是無可能拄著的人啊！若是有按呢的人，的確佇逐家的眼中，伊就是一个傳奇的人物囉！所以講，我感覺潘銀花伊吸引人的所在嘛因為伊是一个扁平人物，伊永遠是美麗自信ê，袂為著生活來煩惱抑是怨嘆，按呢的典型有影適合營造出一種「大地之母」的感覺，有明顯的代表性，規个小說內底別个人攏干焦是過客，毋過只有伊一直佇遐。

　　「反抗的精神佮對社會的著急造成好的文學」，我感覺這句話會當真好的回應這篇論文對施明正佮七等生的評論。

　　佇這篇論文內底，宋澤萊直直強調的是一个「反抗」的精神，佮存在主義有真大的相關，「但存在主義哲學根本上是一種『反抗的哲學』」（勞思光，《存在主義哲學新編》），存在主義其實就是一種誕生佇時代下的產物，人佇一種極權的環境下，想欲追求一種「自我」，「凡是活在極權政治下的人們……就得接觸存在主義」（勞思光，《存在主義哲學新編》），所以講，「反抗」是為著欲佇按呢的環境內底維持一个「個體」，彼就是一款存在主義。

　　〈白線〉這篇小說，我感覺白線代表一種「規矩」，一个「軌道」的概念，因為男主角就是佇路上的白線頂出車禍--ê，敢若咧講，伊因為家己無法度控制的原因（路面傷滑）才會偏離原來駛車的路壓到中間的白線，若像伊的人生。

　　毋知影臺灣像番薯的講法是對當時開始--ê。

　　我感覺〈人講你是一條番薯〉毋但咧諷刺殖民者爾爾，嘛有對臺灣人恨鐵不成鋼的感覺佇內底。

　　毋知敢是因為頂擺吳濁流的作品的緣故，予我對臺灣的現狀佮臺灣人對臺灣本身的看法有真大的反思，佇這擺林宗源的〈人講你是一條番薯〉內底，我感覺我感受著的是另外一方面，對臺灣人無夠有志氣的無奈。

　　這擺的兩篇論述的文章，攏是佇二戰時代所發生的代誌，嘛予阮看著戰後的臺灣是啥物模樣，彼个時陣的人是啥物感受。

　　我感覺彼个時代的臺灣人實在可憐，永遠毋知影家己是啥物人，到底是臺灣人、日本人、抑是中國人？《亞細亞的孤兒》就是佇按呢的認同無法度確定的時陣所產生的一款必然，我認為是必然；雖然這个必然毋是臺灣人家己造成、家己願意ê，是佇長期予外人統治的環境下，所產生的一種悲哀的習慣。

　　毋過我嘛感覺會產生按呢的結果佮無法度揣著認同，臺灣人嘛袂當講完全無關係，Satre講，人有自由意志，所以阮家己所做的選擇家己愛承擔，人是按怎是人，是因為伊選擇做為一个人，按呢講，重點就是彼時陣的臺灣人敢有選擇欲做一个臺灣人？而且選擇像Jaspers講ê，去實現家己選擇的存在？

       灣生，一陣共臺灣當做in的故鄉的日本人。

　　我上佮意的阿公阿媽是富永勝阿公佮多恵子阿媽，in予我感覺有滿滿的熱情佮對臺灣的熱愛，毋是講別人無，毋過我感覺in是真可愛的兩个阿公阿媽，可能是本身就是真有活力的人，毋過我更加相信是因為in對臺灣的愛，予in佇這片土地的時陣予in有美好的感覺。

　　佇富永勝阿公來到伊的一个朋友in兜，煞發現佇伊ê卡片寄著進前，伊的朋友煞已經過身矣，伊的真濟朋友嘛真濟攏無佇咧矣，這予我感覺真毋甘，我無法度想像佇滿心歡喜來到臺灣（伊的故鄉）的時陣，煞人事已非的感覺，彼有偌艱苦？毋過伊對臺灣猶是充滿熱情，聽伊講起伊的回憶，我感覺嘛會當感受著遐ê美好的少年時光。

　　我佇這篇論文當中學著真濟，我第一擺知影一篇小說是用遐爾濟的角度來分析--ê，而且原來一篇小說內底會當看著遐爾濟物件（以早的我攏是看過去爾爾，頂學期是第一擺用無仝的角度去看作品），毋過宋澤萊的一篇論文予我拍開一个新的視野，知影原來寫一篇小說的時陣愛注意的有遐濟，而且別人會用啥物角度咧看--你。

　　比如講第一部分講--ê，人物的描寫，若是我家己看，絕對無法度對這款的角度來分析思考，只會曉戇戇綴咧看，嘛是講綴咧作家的功力咧走，毋過家己無啥物深入的思考；這擺我學著平常袂注意著--ê，人物的性格無需要直接寫出--來，透過伊穿的衫、眼神、動作、閣有外表，就會當予人產生對這个人的感覺佮想像，而且更加有畫面。另外一部分提著，人物有分扁ê佮圓ê，這嘛予我一个新的熟似，以早看小說嘛攏完全袂按呢思考，家己試看咧寫嘛攏無思考過這款代誌，以前就是寫趣味ê，毋過看了遮ê分析閣回想家己以早無成熟的作品，實在亂到連用按呢的方式去分析攏無辦法，會當予人分析的作品，本身就愛是一个真好的作品才會使！

　　第二部分咧講背景，我感覺佇〈植〉內底背景佮角色的關係內底，我看著的是主角的心情佮伊所看著的景物的關係，人的心情佮意識會影響伊所看著的物件，雖然作者嘛有一寡對景色的安排（日頭的部分），毋過我感覺予我較深刻印象的是角色心情佮背景的關連，因為伊的景色描寫真濟是透過主角的目睭來看ê，予我閣較自然、無刻意安排的感受，因為彼就是這个角色彼陣的心情會看著、感受著ê無毋著，這是我非常佮意的部分，毋是作者家己描寫來配合氣氛佮角色，是透過角色的目睭看世界，予讀者會當更加深入的感受著角色的心情。

我感覺許南英的詩是真幼秀--ê，伊比鄭用錫的詩予我感覺閣較有一款細膩的氣質，是較多愁善感--ê，會當較簡單而且清楚ê感受著伊詩內底的情感。

　　可能嘛是伊敏感的心思，予伊感受著社會當中一款風雨欲來的氣氛，心中的不安加上伊的敏感，佇著所愛的人離開、社會的變化、家園予人破壞，伊一定是真鬱卒，感情幼秀的人感受著這一切是比一般人閣較痛苦--ê，in天生重感情，嘛是真有in家己的性地ê，所以伊才會因為傷過傷感抑是好膽佇考試的時陣批評政治，結果攏考袂牢，我想伊毋是毋捌這个道理，伊是一个真優秀的人，咱會當看伊做官時的功勞就知影，我感覺伊是想欲藉考試的機會，表達伊的想法予人（尤其是負責改考卷的高官）知影，對這來講，伊嘛是一个真有想法的人。

　　以早的人可能是因為婚姻攏毋是家己決定的關係，定定想欲揣一个知己，我想許南英嘛是按呢，尤其佇伊這款重感情的人來講更加如此，毋過先莫講我家己對當時社會對女性的無公平的不滿，我感覺真可惜的是佇許南英的詩內底，真少講著伊佮吳湘玉的感情交流佮所謂「知己」的所在，寫真濟的是in的愛情，煞毋是in感情的交流，是按怎伊會愛著--伊，我甘願相信許南英按呢的人愛的是吳湘玉的知己，毋是伊的美貌，毋過對短短幾首詩，可惜是我無法度看著抑是感受著彼款的感情佇內底，雖然無結果的愛情真淒美，毋過按呢我煞當袂牢想欲替伊的某感覺委屈矣。

　　我對園林建築是有真濟想像ê，細漢的時陣看遐的電視劇，攏會感覺古代的皇帝、大官、好額人敢是真正攏蹛佇彼款亭臺樓閣、假山流水、九彎十八斡的迴廊內面，雖然沓沓仔咧大漢，嘛知影毋是想像的遐爾美好，毋過猶是真好奇，對以前人、特別是好額人的生活無法度想像，嘛無任何概念，有概念的攏是一般百姓的生活爾爾，可惜臺灣的園林建築強欲消失了了，無啥物機會通看，著算看著嘛是只賰外口的建築，無可能連內底原底生活的原貌攏保存矣，實在有夠可惜。

這擺看著宋澤萊提著的園林，像北園別館、夢蝶園……等等，我攏去共伊揣圖片出來看覓，雖然攏變做廟，毋過猶攏真有規模，看圖片就予人讚嘆，對這寡閣有保存的園林，予我對北郭園有閣較明確的想像起點。

　　我感覺鄭用錫的詩除了較特別的用字佮用典以外，其實袂傷歹理解，嘛會當對遮來感受著伊單純樸實的心，我以早嘛想欲避世隱居，雖然彼个時陣予老師講我是咧寫八股的文章予我感覺真傷心，毋過老師嘛講出我文章無夠的所在，就是感情，予我真大的提醒，對彼个時陣我就開始磨練家己佇文章內底的情感，而且除了情感以外，嘛袂當無內容，所以我佮意鄭用錫遐爾單純直接的表達方式佮伊的作品，予我感覺這个人無啥物心機，真好相處，嘛會當感受著伊對伊的北郭園的佮意佮蹛佇內底予伊的自在。

       講到宋澤萊的〈評郁永河的《裨海紀遊》－－並論臺灣文學史上的傳奇時代〉，我佮同學有真濟的討論，逐家咧看文章的看法無仝，嘛產生真濟辯論佮互相的衝突。

　　阮感覺，佇遊記當中，欲掌握寫實佮傳奇的平衡是困難ê，郁永河就是明顯較倚傳奇的寫法，佮伊一開始咧寫《裨海紀遊》的設定有關係，嘛佮宋澤萊講ê，「清朝前期所以發生傳奇文學的原因是不由自主的」相仝，佇彼个時陣，文人離開中國寫的見聞，想來十有八九是按呢的形式，共家己偉大化矣，是因為大中原主義對in來講是理所當然ê；阮閣提出《老殘遊記》做討論，雖然伊是諷刺文學，毋過伊的遊記部份就感覺較寫實、佮客觀，阮感覺是因為伊遊歷的所在是佇中國內部的關係，毋過這只是討論佮臆測，若真正欲講，可能愛共in的文本攏提出來比較，這閣是另外一番工夫矣。

　　毋過，阮嘛咧討論講，為啥物宋澤萊佇已經知影郁永河咧寫《裨海紀遊》的時陣，就是以一个「傳奇」的角度來寫、刁工共困難誇大矣，閣欲以一篇「旅遊紀實文學」的角度來看《裨海紀遊》？若以這个角度來看，可能是因為伊認為「傳奇」是內容，毋過「旅遊紀實文學」是這篇的本體，郁永河會當寫出旅途的困難，毋過袂當偏離伊所看著的事實、嘛會當講是因為郁永河對臺灣的無熟似，伊的修辭就超過事實，濟到無必要矣；毋過，若以郁永河的角度來看──因為阮嘛毋知，所以這是一个阮的討論當中產生的臆測──伊可能一開始就想欲完成一篇「小說化」的散文，共旅途困難化、共家己英雄化，攏總發揮到上大；抑是講《裨海紀遊》就是一篇「旅遊文學」，郁永河可能只是共伊所見予伊的「感覺」，用抽象的方式記錄落來爾爾，所以對臺灣的無了解產生的錯誤描寫、抑是傷過譀古的譬喻攏無重要，彼只不過是伊的「感覺」。

「欸！那邊那個！你在幹麻啊！」萊特一轉身，就看見比自己高一個頭、年紀和自己差不多的小女孩，正插腰看著自己。

「……呃？」萊特呆了一呆，用手指著自己，不確定對方叫的是誰。

「對！就是你！」小女孩指著他，一臉認真，「我要你來陪我玩！」